Povrina dum la pasintaj monatoj

Publikigita de El Popola Ĉinio la Mar, 03/22/2016 - 23:00
Karaj ka(t)maradoj! Jam dum ok monatoj mi skribis nenion pri la farto de la katino Povrina, kiu ekloĝis en la interna korto de nia laborejo. Pardonon, ke mi tiom longe atendigis vin. Unuvorte dirite, ŝi bone fartas, kvankam lastatempe la pekina varmego sufokas ne nur homojn sed ankaŭ ŝin. Nun la katino kutime sternas sin ie ekstere, ekzemple supre de ŝia propra dometo, foje eĉ kun la ventro supren – mi volus averti ŝin, ke ŝi devus esti pli singarda ĉar ŝi ja ne loĝas en loĝejo de homoj, kie estus absolute sekure. Sed mi ja ne scipovas la … katan.