En la 1970-aj kaj 1980-aj jaroj funkciis tre aktiva laborgrupo de UEA ĉe la ĉefsidejo de Unuiĝintaj Nacioj en Novjorko. Inter la pintaj agantoj tiam estis Humphrey Tonkin. Nun sub lia gvido estas starigata nova laborgrupo, kiu jam faris siajn unuajn paŝojn.

Tiu ĉi eldono de UEA viva prezentas du scenojn el la 94-a Universala Kongreso de Esperanto en Bjalistoko:
- Parolado de la urbestro prof. Tadeusz Truskolaski en la urba akcepto, kiu okazis la 31-an de julio en la Palaco de Branicki kaj en kiu prezentiĝis ankaŭ la muzika kaj danca ensemblo Capella Antiqua Bialistocensis;
- Parolado de Humphrey Tonkin en la kongresa bankedo la 29-an de julio.

En letero sendita al la gvidantoj de Barato, Brazilo, Ĉinio kaj Rusio, la prezidanto de Universala Esperanto-Asocio proponis, ke la kvar "promesaj landoj por la estonteco" laboru por ĉesigi ne nur valutajn, sed ankaŭ lingvajn privilegiojn.

Kuninvitantoj estas la ambasadoroj de Pollando kaj Litovio ĉe Unesko, kiuj persone ĉeestos la aranĝon. La aranĝo okazas la 15-an de decembro en kunlaboro kun UEA kaj subtenate de la Kultura sektoro de Unesko.